Shkolla shqipe Ostermundigen që operon në Zvicër ka përfunduar një periudhë të suksesshme mësimore. Gjatë këtij planprogrami mësimor ka organizuar aktivitete tërheqëse dhe kulturore për fëmijët, duke u përkujdesur që përmes tyre procesi mësimor të bëhet më argëtues dhe të realizohet të nxënit në gjuhën shqipe.
Nxënës të dashur ju që e mësoni dhe e ruani me përkushtim gjuhën e të parëve, kalofshi mirë në pushimet e pranverës! – thuhet në urimin e shkollës.
Kjo shkollë këtë vit organizoi një piknik pranveror ku mblodhi nxënës, prindër dhe gjyshërit e tyre. Gjatë këtij pikniku ishte e pranishme edhe kryesia e Shoqatës Kulturore Bashkimi, që njëherësh është bashkorganizatore e aktiviteteve kulturore që shkolla organizon. Në këtë piknik nuk munguan lojrat, ngjyrat, muzika si dhe tavolinat e mbushura me ushqim për të pranishmit.
Bashkëbisedimet, shkrimet dhe orët letrare ishin disa nga aktivitetet me rastin e ditëve të rëndësishme. Për nder të 7 dhe 8 Marsit shkolla organizoi orë letrare, në të cilën u lexuan poezi të rrjedhshme në gjuhën shqipe kushtuar nënës dhe mësueses. Gjatë ditëve tjera nxënësit poashtu patën rastin të njiheshin edhe me figurat e sportistëve shqiptarë në Zvicër dhe të organizojnë orë muzikore ku këndoheshin këngë në gjuhën shqipe.
Shkolla gjithmonë falemnderon nxënësit për punën e tyre të shkëlqyer si dhe të gjithë pjesëmarrësit e organizatorët.
