Festivali evropian këtë të marte publikoi listat e shteteve përkatëse që do të performojnë në dy netët e gjysmëfinales. Një ndë to do të jetë edhe Shqipëria, e cila do të përfaqësohet nga Albina dhe Familja Kelmendi me këngën “Duje».
Shqipëria sipas shortit është vendosur të performojë në natën e dytë gjysmëfinale të 11 majit, në të cilën do të garojnë plot 16 shtete.
Krahas Shqipërisë, në natën e dytë prezantohen shtetet: Armenia, Qipro, Rumania, Danimarka, Belgjika, Islanda, Greqia, Estonia, Australia, Austria, Lituania, San Marino, Sllovenia, Gjeorgjia dhe Polonia.
Ndërsa në natën e parë garojnë 17 shtete të cilat janë: Serbia, Letonia, Irlanda, Norvegjia, Portugalia, Kroacia, Malta, Suedia, Moldavia, Zvicra, Izraeli, Holanda, Finlanda, Azerbajxhani dhe Republika Çeke.
Vetëm 10 shtete nga nata e parë, dhe 10 shtete nga nata e dytë do të kualifikohen në finalen e madhe të 13 majit.
20 finalistëve nga dy netët gjysmëfinale, iu bashkëngjiten pesë shtetet e përhershme finaliste (Spanja, Franca, Mbretëria e Bashkuar, Italia dhe Gjermania) si dhe shteti fitues i vitit të kaluar (Ukraina), të cilët plotësojnë listën e 26 shteteve finaliste.
Ky Eurovision do të zhvillohet në Liverpool të Mbretërisë së Bashkuar.
