Prof. dr. Vaxhid Sejdiu: Takime dhe bashkëpunime në shërbim të diasporës shqiptare
Samiti i Diasporës u dëshmua jo vetëm si një aktivitet i mirë-organizuar, por edhe si një platformë e rëndësishme për forcimin e lidhjeve ndërmjet institucioneve shqiptare dhe përfaqësuesve të mërgatës. Organizimi i kujdesshëm nga Agjencia Kombëtare e Diasporës krijoi hapësirë që, përveç prezantimeve të shumta, të zhvilloheshin edhe takime të drejtpërdrejta me përfaqësues të institucioneve shtetërore shqiptare.
Një nga momentet më të rëndësishme ishte pritja e organizuar më 16 prill 2026 nga Presidenti i Republikës së Shqipërisë, Bajram Begaj. Në këtë takim, anëtarët e Këshillit Koordinues të Diasporës patën mundësinë të zhvillojnë një bashkëbisedim të hapur dhe konstruktiv, duke shkëmbyer mendime mbi sfidat dhe perspektivat e diasporës shqiptare.
Diskutimet u përqendruan në rolin e diasporës në zhvillimin e vendit, në ruajtjen e identitetit kombëtar dhe në rritjen e bashkëpunimit në fusha të ndryshme. Presidenti shprehu interes të veçantë për angazhimet konkrete të komuniteteve shqiptare në vende të ndryshme dhe theksoi rëndësinë e përfshirjes sa më të gjerë të bashkatdhetarëve në iniciativa të përbashkëta. Në fokus ishin jo vetëm gjuha dhe kultura, por edhe fusha si biznesi, arsimi, sporti dhe turizmi, të cilat përbëjnë ura të forta lidhëse mes Shqipërisë dhe diasporës.
Në këtë rrugëtim të përbashkët u theksua se sukseset e shqiptarëve në mbarë botën duhet të promovohen më fuqishëm, si modele frymëzimi për brezat e rinj. Pyetjet dhe diskutimet gjatë takimit hapën horizonte të reja bashkëpunimi, duke nxitur ide konkrete për projekte të ardhshme.
Vizita vijoi me një ndalesë në Pallatin Presidencial, ku pjesëmarrësit u njohën më nga afër me historikun dhe funksionimin e institucionit të Presidencës, falë shoqërimit dhe shpjegimeve të stafit përkatës.
Një tjetër takim i rëndësishëm u zhvillua në Akademinë e Shkencave të Republikës së Shqipërisë, ku kryetari, Skënder Gjinushi, priti delegacionin së bashku me bashkëpunëtorët e tij. Në fjalën e tij, ai vlerësoi kontributin e veprimtarëve të diasporës në ruajtjen dhe zhvillimin e gjuhës dhe kulturës shqiptare, si dhe në avancimin e shqiptarëve në fusha të ndryshme profesionale dhe shkencore.
Po ashtu, një vizitë me interes të veçantë ishte ajo në Komisionin Qendror të Zgjedhjeve, ku kryetari Ilirjan Celibashi dhe stafi i tij organizuan një pritje të ngrohtë. Në këtë takim u diskutua rëndësia e votës së diasporës dhe përpjekjet për ta bërë atë sa më funksionale dhe gjithëpërfshirëse. Në shenjë vlerësimi për angazhimin e vazhdueshëm, KKD-së iu nda një mirënjohje për kontributin në këtë drejtim. Vlen të theksohet gjithashtu angazhimi i veprimtareve të KKD-së, Anila Hyka dhe Brikena Muharemi.
Në përmbyllje të këtyre aktiviteteve, pjesëmarrësit u pritën në ambientet e “Tradita.al”, ku u zhvilluan biseda konkrete për projekte të reja në funksion të promovimit të trashëgimisë kulturore shqiptare. Diskutimet u fokusuan veçanërisht në mënyrat e prezantimit të veshjeve kombëtare dhe të traditave shqiptare në aktivitete të ardhshme, duke synuar një përfaqësim sa më dinjitoz dhe bashkëkohor. Drejtuesja dhe figura kryesore e kësaj iniciative, znj. Edlira Sulaj, pasi informoi anëtarët e KKD-së për punën në ruajtjen dhe promovimin e trashëgimisë etnografike, organizimin e aktiviteteve dhe ekspozitave kulturore, kishte përgatitur edhe ushqime tradicionale shqiptare për të pranishmit.
Në tërësi, këto takime dëshmuan qartë se bashkëpunimi ndërmjet institucioneve të Shqipërisë dhe diasporës është jo vetëm i nevojshëm, por edhe gjithnjë e më i strukturuar. Ato shërbyen si një hap i rëndësishëm drejt forcimit të lidhjeve kombëtare dhe ndërtimit të një vizioni të përbashkët për të ardhmen e shqiptarëve kudo në botë.
