Mentor Thaqi: EV MJESHTËR, EV

(Artistit dhe Atdhetarit Dan Gashi, post mortem)

Ev Dan Gashi! Ev Artist, ev!

Po pse u ngute kaq shumë o Mjeshtër?!

Kjo ikje e jote keq zemrat na i theu,

na u ngrinë sytë n´lotin e parreshtur!

Për ku u nxitove o Burrë i Dheut?

Na e ktheve shpinën në heshtje,

t´ngarkueme rreth qafe brengën e Atdheut,

e shpirtin prush dhe flakë prej eshke!

Po me brushen pse u idhnove?

Pikturen e nisur në gjysmë e lè!

O Mjeshtër, kush të joshi që u nxitove,

të paktën bre shoq, lamtumirë s´na the!?

Edhe Ujëza jote e bregut të Drinit,

as një fjalë prej teje s´e ndjeu,

në këtë Janar të zymtë të dimrit,

që sall lajmi i hidhur, heshtjen ia theu!

E ne shokët e vrapit të hershëm atdhetar,

mbetëm gojëhapur e me lot në sy,

librat tuaj po i mbajmë në sirtarë,

se kujtimeve të shumta, zemra s´iu vën dry!

Para syshë na dalin vitet e 90-ta,

me itinerar të ngjeshur veprimesh,

të stërmbushur brenga na ndizte zjarr jeta,

e ne veç stërmbusheshim elan prej takimesh!

Ah, Mjeshtër i Artit, si mund ta harroj,

atë melodi të fyllit, bashkë me mua në skenë?!

Më fal o Artist, dhimbja më ligështoi,

Lamtumirën s´ta duam, se mes nesh ti je!

Mentor Thaqi

25 Kallnor 2023