(Shkruan nga Gjeneva: Mirishahe Limani Hiler)
Të dashurit e familjes sime, të dashur miq, të njohur e të panjohur, ju që po i lexoni këto rreshta, ju që sot jeni në Kosovë…
Sot do të doja për disa çaste t’ju flas përmes kësaj letre për rëndësinë e zërit tonë si qytetarë.
Ne kemi privilegjin dhe përgjegjësinë të marrim pjesë aktive në jetën demokratike të vendit tonë dhe një nga mënyrat më të mira për të kontribuar është të ushtrojmë të drejtën tonë të votës.
Votimi është më shumë se një detyrë qytetare, është një mënyrë për të dëgjuar zërin tonë, për të formuar të ardhmen tonë dhe për të marrë pjesë në vendime që na prekin të gjithëve.
Çdo votë ka rëndësi dhe duke marrë pjesë në zgjedhje kemi mundësinë të ndikojmë në rrjedhën e ngjarjeve, të zgjedhim liderët që na përfaqësojnë dhe të pohojmë idetë tona.
Duke votuar, ne mund të shprehim bindjet tona, të mbrojmë kauzat që na interesojnë dhe të kontribuojmë në ndërtimin e një shoqërie më të drejtë dhe më të barabartë.
Është një mundësi për të mbajtur qëndrim për çështjet që na shqetësojnë, qoftë mjedisi, arsimi, shëndetësia, ekonomia apo të drejtat themelore.
Vota jonë është zëri ynë dhe mund të bëjë ndryshim.
Është e vërtetë që ndonjëherë politika mund të duket komplekse, konfuze, madje edhe zhgënjyese. Por pikërisht kjo është arsyeja pse pjesëmarrja jonë është thelbësore.
Duke u përfshirë në procesin demokratik, ne kemi mundësinë të ndihmojmë të bëjmë një ndryshim, të përmirësojmë shoqërinë tonë dhe të ndërtojmë një të ardhme më të mirë për veten, familjet tona dhe brezat e ardhshëm.
Është e rëndësishme të kujtojmë se e drejta e votës u fitua me çmimin e betejave dhe sakrificave. Burra dhe gra luftuan që ne të mund ta ushtronim këtë liri themelore. Kosova nuk na ka pikur nga qielli! As edhe liria e saj, ju e dini këtë.
Ne kemi përgjegjësi për të mbajtur gjallë këtë demokraci, për të respektuar trashëgiminë e tyre dhe për të vlerësuar këtë të drejtë të çmuar.
Prandaj ju ftoj, të dashur, të mos e merrni me mendjelehtësi të drejtën tonë të votës.
T’paktën gjatë fushatës elektorale keni mësuar për shumë çështje, mbi programet politike, kandidatët. Keni marrë pjesë në debate, shkëmbyer mendimet tuaja dhe mbajtur qëndrim.
Sot, mbi të gjitha shkoni dhe votoni në zgjedhje, sepse aty zëri ynë kthehet në veprim konkret.
Duke votuar, ne ndihmojmë në formimin e së ardhmes sonë kolektive, duke shprehur vlerat dhe aspiratat tona.
Asnjëherë mos e nënvlerësoni fuqinë e votës suaj.
Së bashku ne mund të bëjmë ndryshime. Së bashku ne mund të ecim me kokën lart!
Pra, të dashurit e mi shumë të respektuar, le të përfshihemi, të mobilizohemi dhe të shkojmë të votojmë.
Le të dëgjojmë zërat tanë dhe të jemi aktorë të ndryshimit.
Demokracia jonë varet prej votës sonë dhe ne jemi garantuesit e saj.
Me gjithë entuziazmin, dashurinë dhe respektin, e juaja, Mirishahe Limani Hiler 09 shkurt 2025, Gjenevë
