Fluturimthi
Duke ecur në Prishtinë
Pranë objektit të ASHAK-ut
E gjithë gjërave tjera që rrethojnë këtë pjesë
U ndala për më pak se një minutë
Të shihja një harabel mes pëllumbave
Dhe shkrepa në 13 e 47 minuta
Në këtë të shtunë të bukur
Kjo ditë e këndshme vazhdon
Dielli shpërndan rreze vitaminash
E era shpërndan përkëdhelje shpërgjumëshe
Ec me një libër të mirë
Me tregime e poezi
Në njërin xhep të palltos
Që mban kokën jashtë
Si dikush që ka hipur në shkallë
Për të vështruar nga një dritare
Se ç’po ngjet jashtë
E pëllumbat dhe harabeli
Tremben e fluturimthi flatrojnë flatrat
E me drojë ma tërheqin vërejtjen
Më qortojnë se i tremba pa të drejtë
Derisa ishin duke ecë përtokë
Si unë në këtë ditë
Kur janari po bëhet gati të largohet
Si dikush që më s’i duhet vizë
