“Arbëresha” e Zvicrës defiloi me një spektakël tejet mbresëlënës

664

Ansambli „Arbëresha“ nga Sirnachu , mbrëmë në 16 vjetorin e themelimit, në prani të qindra shikuesve defiloi në skenë me një program tejet freskues, përfshi edhe një koreografi të Feim Lekës dhe një shoi spektakli të reperit afrikan, Cliqme, që njihet për stilin e tij të këndimit shqip.

Testi e fotot: Rexhep Rifati  

Si zakonisht në çdo përvjetor e edhe mbrëmë( më 25 Janar 2020), në 16 vjetorin e themelimit Ansambli „Arbëresha“ nga Sirnachi (TG), para disa qindra shikuesve në Stadtsaal Wil, doli me një program më se mbresëlënës, të përgatitur nga vet anëtarët tejet aktiv të kësaj trupe, por edhe me disa pika artistike nga mysafirë special nga fusha e muzikës.

Që në fillim do theksuar se falë një pune të përqendruar si në planin organizativ , ashtu edhe artistik “Arbëresha” sot radhitet në mesin e grupeve më aktive e më cilësore por edhe më kolegjiale në mesin e shoqërive, falë edhe një komuniteti që nuk kursen as mjete e as përkrahje morale për ta mbështet këtë shoqëri, ku edhe kanë fëmijët e tyre të angazhuar në masë të madhe.

Që në fillim me një minutë u nderuan të rënët për liri si dhe u kujtua me pietet ish- kryetar ansamblit, Lulzim Saliquni, prindërit e të cilit as mbrëmë nuk munguan në këtë tubim festiv.

Vet programi i mbrëmshëm, qiti në pah sesa janë të angazhuar, prind anëtarë e sidomos kryesia në krye me artistin, Nue Uka, i cili edhe mbajti një fjalë përshëndetëse, duke e ndarë rezultatin e ansamblit të tij edhe me vet anëtarët e grupit por edhe prindërit e tyre, shtuar këtu edhe mbështetjen e përhershme që jep Misioni Katolik Shqiptar në Zvicrën Lindore, në krye me dom Albert Demajn.

Po ashtu të pranishmëve iu drejtua edhe dom Albert Demaj, udhëheqës i Misionit Katolik Shqiptar në Zvicrën Lindore i cili shprehi kënaqësinë për rritën e vazhdueshme të “Arbëreshës” nga një grup i vogël në një ansambël që tash ka bërë emër edhe jashtë kufijve të shtetit helvetik, duke bartë një copë kulture shqiptare në dhe të huaj, në vazhdimin e gjuhës dhe traditës së lashtë shqiptare.

Me një fjalë përshëndetëse, të pranishmëve iu drejtua edhe zonja Shukrije Ramadani, konsulle e Republikës së Kosovës në Cyrih, e cila përgëzoi trupën artistike të ansamblit “Arbëresha” për punën e madhe që po bënë në prezantimin e vlerave tona jo vetëm brenda komunitetit tonë por edhe më gjerë.

Marrë në tersi edhe pikat e programit qenë mjaft mbresëlënëse, si nga grupi i fëmijëve ashtu edhe grupi i të rriturve, që dolën në skenë me disa valle të mjediseve të ndryshme shqiptare, përfshi këtu edhe një koreografi të Feim Lekës, njërit nga vallëzuesit më të mirë të Ansamblit Kombëtar “Shota”.

Edhe prezenca e mysafirëve special , si ajo e Qëndresës nga Lucerni , pastaj Mimoza Shkodrës e sidomos e reperit afrikan, Cliqme një këngëtar që tashmë ka fituar popullaritetin e shumë shqiptarëve edhe me këndime shqip, ndonëse siç tha me shqiptar dhe gjuhën shqipe njihet vetëm për një vit e sa. Vet stili i tij të këndimit afro-shqip, ngriti në këmbë një pjesë të publikut e sidomos të botës rinore që donte të ketë gjithsesi një foto me këtë afrikan që me aq zell e dashuri këndon e flet shqip.

Gjithashtu në këtë përvjetor merrnin pjesë edhe drejtues të grupeve artistike simotra nga disa kantone.